حال المواطن المصرى الغلبان
وانا بجرى ىشعرت بإنسان
بيجرى ورايا
بتلفت لقيته بوليس
لقيت دمى هرب مني
وفاجئه خلييت من الاحاسيس
لقيتلك خطونى اختلت
لقيتلك هدمتى ابتلت
بقيت وانا بجرى بطوح
منشعارف دى حاجه بجد
ولا نوع من الكوابيس
بتجرى ورايا ليه يابوليس
دنا ف حالى مليش ف الدنيا
لاصوت ولا جسم
دنا ناقص إذا قربت لمراتى
أجيب تصريح ياناس من القسم
وأدلدل راسى وأوطى
وبمشى ف الصيف متغطى
وبقوم من وسط أى جماعه
بتعارض ولو إبليس
بتجرى ورايا ليه يابوليس
انا اصلا بخاف اشترى الجرنان
وفى أيات بخاف اقرأها ف القرأن
ولما بفوت ع التمثال
بقول شلله ياشيخ رمسيس
بتجرى ورايا ليه يابوليس
ولاعرف يعنى ايه سياسه
ولا حسابات
ولافهم يعنى ايه أحزاب
ولا انتخابات
انا موافق بكل مكان بأى رئيس
بتجرى ورايا ليه يابوليس
دنا معاهدك أعيش العمر محتاجلك
أبوس ايدك ابوس رجلك
تقولى عملت ايه وانا توب
منا عارف بإن ماضينا وحاضرنا
ومستقبلنا كله عندكم مكتوب
وحتى لو غلط اغفرلى
اعمل ايه شيطانى خسيس
بتجرى ورايا ليه يابوليس
دنا لكلاب شارعنا بدفع الفيرده
بخاف اسخن اكلى
وباكل لقمتى بارده
ودايما بعتبر نفسى
عروسه والحكومه عريس
بتجرى ورايا ليه يابوليس
وايه يعنى لما تبقى دى بلدكم
واحنا فيها ضيوف
وايه يعنى لما يبقى الحى ميت
والبصير مكفوف
اديكم بتسمعو بدالنا
وبنشوفو بدل منشوف
وانتو الدنيا وانتو الدين
ويموت الشيخ مع القسيس
بتجرى ورايا ليه يابوليس
وفاجئه كعبلتنى الطوبه بنت الكلب
وقربلى وممسكنيش
عرفت انه ميقصدنيش
اتاريه كان بيجرى بسرعه
عشان يحصل الاتوبيس
هههههههههههههههههههههه
الرئيسية 
موضوع: بتجرى ورايا ليه يابوليس 
الإثنين مايو 16, 2022 12:12 pm
