بمناسبة انخداع الناس بلمظاهر
تعالو نشوف ايه حكاية محسن افندى
يلا بينا
.
محسن افندى محمد عبدالعال
صاحب عيله كبيره
مراته وست عيال
عنده اسم الله حسن
وحسين وسعيد ونوال
والمقروصه نفيسه واخوها
الواد وصال
محسن افندى مدرس عربى
قديم ومتين
شكله تشوفو تقول ع طول
من أهل الدين
شايل سبحه خشب البندق
من الغالين
غير السبحه تلقى زبيبه
فى قورته كمان
يعنى دليل ع انه بيسجد للرحمن
هيبه وتقوى ومظهر ناطق بلإيمان
ثما الماشيه عليها القيمه وفيها جلال
ومحسن افندى ساكن شقه ف رابع دور
ف بيت الحاج خميس ومراته الحاجه بدور
كانو حبايب قبل مايحصل المقدور
وف يوم نحس اتقلب البيت واتبدل الحال
ابن الحاج خميس كان عامل كوره شراب
والعصريه نازل يلعب جنب الباب
جاى بيشوط ام طارت فرده من القبقاب
جات ف زبيبة محسن افندى ودمها سال
ضحكت عيشه مرات السقا وقالت يوه
ظاطو عيال الحاره وقالو الجردل اهو
محسن افندى اتلخبط عقله ومبقاش له
رزع الواد قلمين سخنين كومه ف الحال
صرخت نوسه مرات محمود عبدالجواد
حوشو ياخواتى الحقو دا الراجل قتل الواد
نزل السيد سالم يجرى وقال ياولاد
اوعو الراجل يفلت منكم دا موتو حلال
خش محمد لطفى يخلص ف الموضوع
خد سكينه ف جنبه وكان عيان موجوع
وقع ع الارض وعينه تشر دموع
هى ثوانى وكانت روحو طلعت للمتعال
هاجو العالم والحريم فقعت بصوت
وامه تقول ياحبيبى ازاى دهولك الموت
ومحسن افندى لم عياله . وعلي برغوت
طلب النجده من تليفون عبده البقال
وصلت النجده ولقو حوالين الجثه اتنين
اخته بتلطم وامه بتتمرغ ف الطين
وسأل الظابط فين اومال المتعاركين
قالت نوسه من شباكها د ابو وصال
طلعت هجمه انشالله محد يشوفها ياناس
رزعو الباب قسموه اتنين طار الترباس
وخبط الحله ساح منها القلقاس
عاص القله ولغمط وش البت نوال
محسن افندى وقف ع حيله وفال جرا ايه
انت ازاى تتهجم كده ع بيتى يابيه
لاشو الظابط صرخو عياله وقاله احيه
حسن اترمى ع ابوه واتشعلق فيه وصال
أمر الظابط العساكر بتفتيش
واللى حيعتر ف السكينه هيبقى شاويش
وبعد مالفو الشقه وداخو وقالو مفيش
لمح الظابط دم مبقع جنب شوال
زغد المخبر وقالو ازاى بتقول فتشت
جرى من خوفو اتكعبل جنب الطشت
لحقه زميله وقال جرا ايه مالك طبشت
قام مزهول مش قادر حته يرد سؤال
مخبر تانى عشان موعود يترقى شاويش
فرد المطوه ومزع بيها شوال الخيش
اول خبطه اتخض وقال ياخبر دا حشيش
محسن افندى وقع منطوله فشر تمثال
كانت طالعه ان شالله محد يشوفها ياهوه
محسن افندى قفاه من كتر الضرب هروه
اربعه منه شالوه وف قلب البوكس رموه
وام عياله تقوله ياسبع البيت ياغزال
أدى محسن افندى
ابو زبيبه وسبحه وست عيال
.
.
الرئيسية 
موضوع: محسن افندى 
الأربعاء مارس 23, 2022 1:39 am
